S Jodle isch eifach mis gröschte Hobby.

Sit über 45 Johr beni im Jodlerklub „Echo“ derby. Und ig muess säge, i has no nie bereut. Wenn’s eim guet geit, so geits eim i de Probe no besser. Voller Freude singt me met und es glingt ou immer alles.

Wenn’s eim einisch schlächt geit, so geits eim besser, we me cha singe. Die Erfahrig hani ömu gmacht. Vor allem ou Probe met de Kamerade hilft über veles ewägg.

A dere Schtell möchti als erschts natürlech mim Ma es härzleches Dankeschön usspräche. Für all die Geduld und Liebi wo är mer entgägebringt.

Liebe Peter i danke Der vo Härze!

All mine Kameradinne und Kamerade es härzlechs Dankeschön. I füehle mi wohl i de Reihe vom Jodlerklub „Echo“. I hoffe, i chöi das no lang gniesse.

Es witers schöns Hobby vo mer isch Tanze. Scho met 16 beni i d Trachtegruppe Niedergösge iträtte. Ou scho e längi Zyt. 15 Johr hani als Tanzleiteri chönne würke. Es het mer immer viel Fröid gmacht. I werde aber ou ned jünger und so hani dörfe s Zepter abgäh. Jetz chanis eifach nur no gniesse.

Das isch aber noni alles!

I ha no es Hobby – es bsunders für me!

Im Johr 1990 hani entdeckt, dass i gärn schticke. Nach eme chline Kurs benere Schtickeri in Basel hani me a das wunderschöne Hobby gwogt. I all däne Johre isch e schtattlichi Anzahl a Trachtetüecher, Göller und Lätz entschtande. I ha do es paar bsunders schöni Exemplar usgsuecht.

Lueget sälber und bildet öiches Urteil!

Wenn der jewils uf d Foti klicket wird si grösser!

Es bsunders Wärch für me, si die 6 rote Festtagstrachte vo de Jodlerinne vom Jodlerklub Egerkinge!

Uf die beni ou ganz stolz!

Mini erschti Chräueli Stickerei! E bsundere Uftrag!

No es paar schöni Stück!

Mini nöischte Schmuckstück!

Das si alles Solothurner Feschttagstrachte!